Ədliyyə Nazirliyi daha bir QHT-nin fəaliyyətinə sədd çəkdi
09/08/2017 127

Ədliyyə Nazirliyi daha bir QHT-nin fəaliyyətinə sədd çəkdi

 “Şəffaflıq Azərbaycan” Korrupsiyaya qarşı Mübarizə İctimai Birliyinin Gəncə və Quba şəhərlərində fəaliyyət göstərən mərkəzləri avqust ayının 1-dən fəaliyyətini dayandırdı. Təşkilatın Bakı ofisi isə qarşıdakı 2 ay ərzində könüllü əsasda fəaliyyətini davam etdirəcək və məhdud miqyasda hüquqi yardım göstərəcəkdir. 

Təşkilatın Bakı ofisi və iki regional mərkəzi Amerika Birləşmiş Ştatları Beynəlxalq İnkişaf Agentliyi (USAID/Azerbaijan) tərəfindən maliyyələşdirilən “Azərbaycan Şəffaflıq Tərəfdaşlığı” layihəsi çərçivəsində xidmət göstərirdi. “Azərbaycan Şəffaflıq Tərəfdaşlığı” layihəsinin müddətinin uzadılması ilə bağlı cari ilin 17 fevral tarixində Ədliyyə Nazirliyinə təqdim edilmiş dəyişikliyin qeydiyyatı ilə bağlı bildirişin (və ya imtinanın) verilməməsi ucbatından təşkilatın Bakıdakı və regionlardakı mərkəzlərinin fəaliyyətininin layihə çərçivəsində maliyyələşməsi mümkün olmamışdır.

Təşkilatın regional mərkəzləri tərəfindən korrupsiya halları, məmur özbaşınalığı və digər hüquq pozmalarla əlaqədar vətəndaşlara pulsuz hüquqi yardım göstərilib. “Azərbaycan Şəffaflıq Tərəfdaşlığı” layihə müddətində (2012-2017) pulsuz hüquqi xidmətlərindən faydalanan vətəndaşların sayı 8080 nəfər olmuşdur. “Şəffaflıq Azərbaycan” təşkilatının regional ofisləri regionlarda bürokratizm, korrupsiya problemlərinin dinamikasının anlaşılması və bu problemlərin aradan qaldırılması üçün hökumətə təkliflərin hazırlanıb təqdim edilməsi baxımından əhəmiyyətli rol oynayıb.

Rasional İnkiaf uğrunda Qadınlar Cəmiyyətinin sədri Şəhla İsmayıl Regional teshkilatın baglanmasının "olduqca mənfi göstərici" kimi dəyərləndirərək ölkənin yavaş-yavaş blokadaya salındığını bildirib. 

Mərkəzlərin fəaliyyətinin dayandırılması hökumətin anti-korrupsiya siyasətinin həyata keçirilməsində vətəndaş cəmiyyətinin rolunun daha da zəifləməsinə gətirib çıxaracaqdır.

Təşkilatımız xarici qrantların qeydə alınması prosesi ilə bağlı mövcud olan çoxsaylı problemlərdən narahatdır. Xarici qrantların qeydə alınmaması praktikası birbaşa sıravi vətəndaşların maraqlarına və Azərbaycanın beynəlxalq nüfuzuna xələl gətirir. Hesab edirik ki, Azərbaycanda sivil hüquqların müdafiəsinin təşkil edilməsi və vətəndaş cəmiyyətinin normal fəaliyyətinin təmin edilməsi üçün qeyri-hökumət təşkilatlarının fəaliyyətinə yaradılmış süni maneələr aradan qaldırılmalıdır.

Ötən dövr ərzində regionlarda vətəndaşlara dürüst və peşəkar şəkildə xidmət göstərmiş əməkdaşlarımıza təşəkkür edirik.